CCCLIII.

1461, Januar 18, o. O.

Der königliche Hauptmann bestätigt dem Kloster den Ankauf der Mahlstatt von Pilz und Dürrhartau.

Ich Hannos von War(n)sdorff von koniglicher machte zcu Bhemen howptman der groffeschafft Glatcz unde zu Franckensteyn bekenne offintlichen mit desem briffe allen, die en sehen, horen unde lezen, das vor mir gestanden haben die erbarn unde woltochtigen, er Segemund von Reichenbach zu Petrowitcz gesessen, mit ym Gorge von dem Brockot seyn vetter, beyde gesunt leybes unde synnen unde in foller macht alde Heyntczen, iunge Heyntczen, Nickils, Gorgen unde Hannus, erer vettern, mit vorgehabtem rote erer frunt, unde haben bekant, das sy recht unde redlich vorkawfft haben im namen eynes rechten erbkawffes eyne molstad, dy do leyt czwischen dem Pyltcz unde der Harte, nemlich an dem flosse, das die Neysse heyst, in dem weicbilde Franckensteyn, mit allir hirschafft, gerechtigkeit unde zugehorungen, alz mit graben, weren, wassern unde wassergengen in aller mosse, wyhe die selbige molstad in allen eren rey(n)en unde grenitczen gelegin ist von aldir awssatzunge unde noch leyt, wyhe man igliches mit gemeynen adir besundern namen benennen mag, keynis awsgenomen, dem erenwirdigen in gote vater herren unde herren Niclas apt zcu Camentcz unde der gantczen samplungen unde allen eren nochkomlingen desselbigen closters. Welche molstadt sy ytczunt den obgenanten Segemunde unde Jorge von Brockot mit bereytem gelde gnüglich wolczudanche beczalt unde vorgolden haben. Ouch haben sich die mebenanten Segemund von Reichenbach unde Jorge Brockot vor mir vorwillet, ap yndert briffe hindersteilig bleben weren, keyner awsgenomen, die obir die obgeschrebene molstad sprechen unde her nochmals vorquemen, sollen vorbas keyne crafft noch macht haben off der molstad unde dem closter keynen schaden brengen nue unde czu ewigen geczeiten, alz nemlich, wenne dy molstad gebawet worde, das sich ynczeiten fynden mag. Czu solchem kawffe, vorreichunge unde ufflosunge habe ich von koniglicher gewalt meyn willen unde gunst gegeben unde habe dem egenanten herren Niclas apte czu Camentcz unde der gantczen sampnungen unde allen eren nochkomlingen die obgenante molstat gelegen unde gelangit, leyhe unde lange in crafft desis briffes mit allen solchen rechten, notczen, genissen, fruchtbarkeiten und hirschafften in allir mosse unde meynunge, alz obgeschreben unde wy sy der obgenante Segemund von Reichenbach unde Jorge Brockot mit eren vettern, allen eren vorsassen, ouch gehat unde besessen haben, gemachzam unde ungehindert, erblich unde ewiglich zubesitczen, methe thun unde lossen, vorkewffen, vorsetczen, vorwechseln, an eren besten notcz, so en das allirfuglichste seyn wirt, ewiglich zuwenden; idach unsers herren des koniges dinste, rechten unde hirschafften unschedlich. Mit orkunde desis briffes vorsegilt mit koniglichem anhangenden ingesegile, das do gehort obir erbe unde sachen ym weicbilde Franckensteyn. Geschen unde gegeben noch Cristi gebort tausent ior virhundert ior dornoch in dem eyn unde sechczigisten, am tage der heligen iuncfrawen Prisca. Des seynt geczewg unsers herren des koniges man, dy woltochtigen: Hannus Reybenitcz von Cawbitcz, Hannus Benisch von Reichenbach czu Quitchendorf, Thomas von Nymis czu Dirstorff, Heyntcze Domantcz von Schrepisdorff, Gorge Yentczwitcz, Wancko Heringk, Heyntcze Melnigk unde Balthazar von Fredelant, dem dese sachen befolen worden.

Or. Perg. An einem Pergamentstreifen hängt das Siegel des Landeshauptmanns. Beschreibung desselben s. No. CCXXIX.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.